मकवानपुर । आउँदो फागुन २१ गते हुने प्रतिनिधिसभा सदस्य निर्वाचन नजिकिँदै जाँदा मकवानपुरमा चुनावी माहोल दिनप्रतिदिन तातिँदै गएको छ।
आजदेखि औपचारिक रूपमा चुनाव प्रचार–प्रसार गर्न पाइने व्यवस्था लागू भएसँगै जिल्लामा राजनीतिक गतिविधि थप सक्रिय बनेको छ ।
निर्वाचन आयोगको नियमअनुसार मतदान मितिभन्दा १५ दिन अघिदेखि मात्र जुलुस, आमसभा, कोणसभा तथा सञ्चारमाध्यममार्फत प्रचार–प्रसार गर्न पाइने प्रावधान छ।
सोही व्यवस्थाअनुसार आजदेखि फागुन १८ गते राति १२ बजेसम्म राजनीतिक दल र उम्मेदवारहरूले प्रचार अभियान सञ्चालन गर्न सक्नेछन्।
आयोगले प्रचारका क्रममा हिंसा, धम्की, लोभलालच तथा सामाजिक सञ्जालमार्फत मिथ्या सूचना र दुष्प्रचार नगर्न कडा निर्देशन दिएको छ।
मकवानपुरका निर्वाचन क्षेत्र नम्बर–१ र नम्बर–२ मा ४४ जना उम्मेदवार चुनावी प्रतिस्पर्धामा उत्रिएका छन्। क्षेत्र नम्बर–१ मा २३ जना र क्षेत्र नम्बर–२ मा २१ जना उम्मेदवारबीच प्रतिस्पर्धा हुँदैछ।
क्षेत्र नम्बर १ मा नेपाली कांग्रेसबाट महालक्ष्मी उपाध्याय डिना, नेकपा एमालेका रामेश्वर राणा, राष्ट्रिय प्रजातन्त्र पार्टीका दीपकबहादुर सिंह र राष्ट्रिय स्वतन्त्र पार्टीका प्रकाश गौतम , नेपाली कम्युनिष्ट पार्टीका विजय गौतम, प्रगतिशील लोकतान्त्रिक पार्टीका तेजप्रसाद उप्रेती र श्रम संस्कृति पार्टीकी विद्या श्रेष्ठ पनि प्रतिस्पर्धामा छन ।
त्यस्तै, क्षेत्र नम्बर २ मा नेकपा एमालेका महेशकुमार बर्तौला, नेपाली कांग्रेसका बुद्ध लामा र राष्ट्रिय स्वतन्त्र पार्टीका प्रशान्त उप्रेती, नेपाली कम्युनिष्ट पार्टीका लवशेर विष्ट, राप्रपाका रामबहादुर थोकर, प्रगतिशील लोकतान्त्रिक पार्टीका सन्तोष विष्ट र श्रम संस्कृति पार्टीका युनिश लामा छन ।
दलहरूले वडा तथा पालिका स्तरमा विस्तारित बैठक, कार्यकर्ता भेला र मतदाता भेटघाट कार्यक्रमलाई तीव्रता दिएका छन्।
जिल्लामा उम्मेदवारहरू घरदैलो अभियानलाई प्राथमिकतामा राख्दै डिजिटल माध्यममार्फत पनि मतदाता समक्ष आफ्ना एजेन्डा प्रस्तुत गरिरहेका छन्।
निर्वाचन आयोगले आचारसंहिताको पूर्ण पालना गर्न सबै दल र उम्मेदवारलाई आग्रह गरेको छ। नियम उल्लंघन भएको खण्डमा सम्बन्धित निर्वाचन अधिकृत वा आयोगमा उजुरी दिन सकिने व्यवस्था गरिएको छ।
यसैबीच मतदाताहरू पनि उम्मेदवारका योजना, प्रतिबद्धता र चुनावी एजेन्डाबारे जानकारी लिन सक्रिय देखिएका छन्।
