मकवानपुर । आगामी फागुन २१ गते हुने प्रतिनिधिसभा निर्वाचनका लागि आवश्यक मतपत्र तथा निर्वाचन सामग्री हेटौंडा आइपुगेको छ। निर्वाचनको मिति नजिकिँदै जाँदा मकवानपुर जिल्लामा तयारी तीव्र बनाइएको छ भने समग्र व्यवस्थापन अन्तिम चरणमा पुगेको जनाइएको छ।
जिल्ला प्रशासन कार्यालय मकवानपुर का प्रमुख जिल्ला अधिकारी बसन्त अधिकारी ले निर्वाचन सम्पन्न गर्न आवश्यक सम्पूर्ण सामग्री जिल्लामा सुरक्षित रूपमा आइपुगेको जानकारी दिएका छन्।
उनका अनुसार मतपत्र, मतदान पेटिका, छाप, मसी, फाराम लगायतका सम्पूर्ण सामग्री जिल्लामा आइसकेका छन् र अब ती सामग्रीहरू सम्बन्धित मतदान केन्द्रमा पठाउने तयारी भइरहेको छ।
फागुन १८ गतेदेखि मतदान अधिकृत तथा सहायक अधिकृतहरू आ–आफ्नो मतदान केन्द्रमा पुग्ने कार्यक्रम तय गरिएको छ। सो अवधिमा मतदाता नामावली प्रकाशन, आवश्यक सूचना टाँस तथा मतदान स्थलको अन्तिम तयारी गरिने प्रशासनले जनाएको छ।
निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न प्रशासनले सुरक्षा व्यवस्थालाई उच्च प्राथमिकतामा राखेको छ। मतदान केन्द्रहरूको भौतिक अवस्था, पहुँच मार्ग, सञ्चार सुविधा तथा संवेदनशीलताको मूल्याङ्कन गरिसकिएको बताइएको छ।
चारै सुरक्षा निकायबीच समन्वय गरेर सुरक्षा योजना तयार गरिएको जनाउँदै प्रशासनले मतदातालाई निर्धक्क भएर मतदान प्रक्रियामा सहभागी हुन आग्रह गरेको छ।
